Pilipinas ang nasod nga akong natawhan
Gamay lang kini nga lugar kung sa mapa imong matan-awan
Matod pa sa kasaysayan, abunda kini ug dayag nga kabtangan
Apan nganong daghan kanato ang naputos sa kalisdanan?
Ay! pagkalawom tugkaron kung unsa gayod ang hinungdan
Tungod ba kaha kini kay ang populasyon nidaghan
O di ba kaha kay sobra na ka badlongon ang katawhan
O di ba hinuon tungod sa mga pulitiko nga kasagaran kawatan.
Populasyon kun ikaw man ang hinungdan
Dili na lang diay kita manganak pa ug daghan
Kay ang kalisod ato gyud mahiaguman
Kun ang atong mga anak dili nato maatiman.
Igo ba kaha nga rason ang mga badlongon nga katawhan
Kun mao man gani, disiplina ra gyud ang atong kinahanglan
Para makab-ot nato ang kalinaw ug kahapsayan
Sa nasod nga karon atong gipuy-an ug gipahimuslan.
Daku kaayo'g posibilidad nga tungod kini sa pulitikong kawatan
Ilang gipamulsa ang bunga sa kahago sa ilang ginsakupan
Busaay nakatukod sila ug mga negosyo nga mao na lay ilang giatiman
Ug ang mga katawhan ila na lang gikalimtan.
Ug karon nga kaming kabisay-an sa kalisod nag-atubang
Tungod sa kalamidad nga among naagian
Asa na man ang gobyerno nga mao untay motabang
Kalimti kami ayaw kay ang mga panghitabo karon sakit na kaayo sa dughan.
Cebu, Bohol, Samar ug Leyte ang mga grabeng naapektuhan
Kusog nga linog ug bagyo among natagamtaman
Bagyo, nga pinakakusog sa kasaysayan sa kalibutan
Usahay makapangutana ako, nganong kami pa man?
Daghan ang patay, gipang-gutom ug balay nga napukan
Ilabi na didto sa Leyte ug Samar nga unang gitugpahan
Sa bagyong Yolanda nga nagkuso-kuso ug kami gibinlan
Sa usa ka makalilisang ug mapait nga kasinatian.
Hain na man ang gobyerno nga unta among masandigan?
Lima na ka adlaw ang nilabay apan daghan pang patay ang wa maatiman
Gutom diri, gutom didto, daghan usab ang wa nay mapasilongan
Operasyon-tabang, nganong naabtan ka man ug siyam-siyam?
Kun ang serbisyo sa mga pulitiko ligdong pa lang unta gikan sa sinugdanan
Dili unta ni namo mahiaguman ang kagutom nga hilabihan
Bisan unsa pa nga kalamidad, dili gyud unta kita mapukan
Apan unsaon ta man, halos silang tanan kawatan.
Nagkadaiyang nasod sa lain-lain nga parte sa kalibutan
Nagpadala na karon ug mga dagku kaayong hinabang
Malooy intawn kamo, ayaw ibutang sa inyong kaugalingong kaban
Ayaw sagoli ug pulitikanhong kinaiya aron maangay ang tanan.
Pagkasubo gayud palandongon sa amo kahimtang
Hinaut unta nga makabangon kami sa amo karon nga gisagubang
Ug dili sad nato kalimtan ang pagsangpit sa atong Diyos Amahan
Nga maoy nakahibalo sa tanan ug maoy atong unang dalangpanan.
